品味生活

品味健康

銅鑼灣初遇修復齒科專科牙醫，原來活動式假牙都未必好

初遇修復齒科專科牙醫，原來活動式假牙都未必好 我阿爸好犀利㗎，90歲人仲行得走得，身體健壯，唯獨是食嘢好似一直都唔係咁好，要咬好耐先吞到，本身以為佢老咗唔鐘意食野所以先食咁慢，但見佢成日都會話想食呢樣嗰樣，但帶到佢去又食唔到幾多。問左好耐佢先話原來佢副假牙戴得好差，成日賣廣告個隻保X健都話無用，諗諗下佢副假牙係十年前喺深圳嘅醫院做嘅，就算唔鬆其實都有機會磨蝕晒，但阿爸一路都唔肯講，怕我嘥錢整新牙，但做仔女邊個想阿爸食唔到自己想食嘅嘢？ [醫生影低左阿爸牙齒狀況，幫阿爸攞多一份copy做記錄] [X光片見到缺牙情況嚴重] 於是兩個月前帶咗佢去附近一間牙科診所到做咗一對可以除嘅假牙，諗住呢種活動式假牙方便清洗又可以等老人家可以除出嚟抖下。點知有一次食飯發現阿爸都仲係咬得好差，原來佢話覺得戴得好唔舒服，同埋好鬆，結果佢又戴返舊個副假牙，佢話至少戴慣咗舒服啲。 [兩個月前訂做的活動式假牙] 問題始終都要解決，老人家最緊要食得訓得，唔想佢因為假牙問題而少去咗食嘢嘅樂趣。最後問咗好多朋友，都有好多不同嘅推薦。例如X國醫院李X文牙醫、X建牙科朱X松牙醫等等，好似口碑都唔錯，不過未親身試過始終唔知牙醫好唔好。不過有個做左好多年姊妹嘅爸爸都有類似煩惱但最後成功搞掂，而且我們住港島區希望方便覆診，所以去左呢個姊妹介紹嘅銅鑼灣牙醫樓恆隆中心裏面嘅家X牙科中心醫生做牙科諮詢，話有唔同專科醫生跟進唔同嘅牙齒問題，服務亦非常好，好照顧病人，同出面唔係好一樣，希望可以幫到阿爸啦。 [冒住俾人話嘅風險偷偷影番低，診所幾新淨企理，不過根據多次覆診經驗，最好book早上最早時段，以免等好耐] 首遇修復齒科專科醫生 記得第一次去會有個全科牙醫檢查一次先，原來阿爸嘅牙骨收縮得好犀利，所以點整都唔會穩陣，同埋需要適應。所以就安排咗同診所嘅修復齒科專科醫生幫阿爸再睇（為免為自己帶來麻煩，我稱之爲超好人專科醫生，因爲我想係診療室影低醫生幫阿爸整副假牙時就俾平時語氣超好嘅醫生好嚴肅話唔可以影相，可能醫生想保持低調掛，所以我費事開名嘞）。超好人專科醫生睇完話牙骨比起十年前已經退化咗不少，未必可以做到好完美嘅假牙，不過一定會好過而家，都建議我地試試。雖然價錢比非專科醫生貴，但坦白講佢比到嘅建議同解釋都好有說服力，連老人家都好聽佢講，佢亦好有耐心咁聽阿爸講戴假牙遇到嘅問題，然後講返嚟緊做嘅嘢點樣幫佢改善到，好比到信心我地，所以最後都決定係呢度處理。 跟住大概每一至兩個星期返去一次，醫生好仔細咁樣每一個步驟都幫阿爸去調校同解釋俾我地知。根據牙醫介紹，而家先知道原來做假牙唔係咁簡單，唔係就咁度個模就整到出嚟，有好多方面都要仔細去量度同埋調校。唔帶阿爸整假牙都唔知整副假牙甚至要評估笑起上嚟假牙露出幾多，或者牙托厚度有冇影響發音，途中度模都做咗兩三次，原來咁樣先可以確保到同牙肉最貼住同冇咁容易鬆。 阿爸終於食得訓得 今次算係第三次帶阿爸整假牙，過程感覺比之前其他診所時間較長，同埋要覆診嘅次數比較多，做完之後阿爸初初亦唔係完全適應到，但係負責做假牙牙醫有跟進調校，最後阿爸都真係開始食返嘢，咬得好咗好多，唔洗再好似之前咁慢慢「妹下妹下」，食之無味又越嚟越瘦，影響埋健康。希望大家唔好以為假牙問題好少事，正視吓屋企老人家嘅牙齒健康。 [新假牙完成，好靚好自然，阿爸好滿意，問左診所囉番幅相做紀錄]